»Sabbel nich, dat geiht« weer dat Motto vun en Plattdüüsch Avend an’n 13. Februor. Wokeen dacht harr, dat dat nich geiht, hett denn ok forts markt, dat dat doch gung: nämlich Plattdüütsch an de Stadtdeelschool Neendörp. – Dat gung sogor allerbest! De beiden Düütschlehrers Michaela Fröh un Heiko Thomsen harrn de Idee hatt to en bunten Avend mit Musik, Gedichten, Geschichten un anner Tüdelkraam op

Platt. Se wullen wat doon för de ole Sassenspraak un dat hebbt se denn ok fein henkregen. Klock söben kunn Schoolleitersche Andrea Kühne üm un bi veertig Lüüd in’n Musiksool begröten. Dor weern toeerst gor nich noog Stöhl dor, man as jedeen sien Platz funnen harr, gung dat los mit Franziska Schreiber, de lest Johr ehr Abitur an de STSN maakt hett. Tosam mit Leonie Rarisch ut Johrgang 13 weer se tostännig för dat Musikprogramm. De beiden jungen Fruunslüüd kregen veel Bifall för jümehr Version vun Knut Kiesewetter sien Klassiker »Fresenhof« un en anner Leed, dat Leonie sülvst schreven un op Platt sungen hett: »Star-crossed lovers«. Se sung dat in den plattdüütschen Dialekt, de op de britischen Inseln snackt warrt: Engelsch. Groten Bifall kregen ok twee lütte Deerns ut Fru Fröh ehr Klass (Ramha un Almina), de en plattdüütschen Dialog vördragen hebbt. De beiden hebbt dat ganz wunnerbor maakt. Man ok Fru Fröh un Herr Thomsen harrn Andeel an dat Programm: Se vertellen toeerst beten wat över de Historie vun de plattdüütsche Spraak, över de Hansetiet un Klaus Groth (Groth sien Gedicht »Matten Has« dröff natürlich nich fehlen – dat weer Lasse Zehler sien Part), un Herr Thomsen wies op Joachim Mähl sien 200. Geboortsdag hen, de 2027 fiert warrn schall. Wokeen kennt em eegentlich noch? Uns plattdüütschen Dichtersmann ut Hamborg-Neendörp? De mehrsten weet woll blots noch, dat hier in’n Stadtdeel en Straat un en U-Bahn-Statschoon na em nöömt sünd. Fru Fröh lees en Geschicht vör, de se 2019 för

»Vertell doch mal!«, den plattdüütschen Schriever-Wettstriet, schreven harr. Mit »Gewetenfragen« is se domals sogor ünner de besten 25 Geschichten kamen. Dat is wat, wat Herr Thomsen düt Johr ok henkriegen will. In sien Version vun den Western-Klassiker »High Noon«, de he to’n Afsluss vörlest hett, weer Sheriff Will Kane en Söhn vun en Dithmarser Buern, de na Amerika utwannert is. – Jo, Plattdüütsch gifft dat eben nich blots in Hamborg-Neendörp, dat gifft dat ok op de anner Siet vun’n Atlantik. De Plattdüütschen harrn dat jo al längst wusst: Plattdüütsch is de wohre Weltspraak!